LI WELATÊ ME - Miş'elê Osman
Li welatê me
Tenê li welatê me
Dirinde laperên jiyana me
dihejmêrin
û bersiva lêdana dilê me nadin
Xewnên me yên şikestî
li ser çêtê konan radixin
Bajar dengê xwe vemirandiye
mal bêxwedî ne
li kolanên bêdeng poşmanî
ji mirovan diherike
lê di tûrikên bîranînan de Kelecana oxirê
veşartî ye
Cergên wan li hemî welatan
belavkirî ne
Li welatê me
Tenê li Welatê me
Dil bi qaçaxî ji sibehan hezdike
em ji sibehan ditirsin
Stêrkên me pûç û zuwa dibin
diçilmisin
Goristan fireh dibin
Di xirbeyan de em bêhna axê dikin
Û li ber mûzîkeke Xemgîn
warê me kirasê êşê li xwe dike
Li welatê me
Tenê li welatê
Gustîlkên bûk û zava
Ji agir e
Em helbestên xwe
bi gulberojan re dihûnin
Û di çavên me de
çiqas şevên bi êş hene
Li welatê me
Tenê li welatê me
mindal di kolanên kempa de
bi "Awazên Kevokan" re
tevna bêrîkirinê dirêsin
Û berbang ji bêhna lehengan
Mest û serxweş e
Li welatê me
Deriyê xeyalan digrin
û çîrokên bê dawî
di sînga me de dilerizin
Dîrok ew sîbera
di navbera ken û girî de ye
Di kolanên demê de
Li welatê me
Tenê li Welatê me
Gava gendel tî dibe
Ken û evîn sêdare dike
Xwîna me bi germî vedixwe
Lê dilê me şermoke
Pîr nabe
Lê dilê me şermoke
Pîr nabe.
ليست هناك تعليقات: