ŞÎNA ÇIYAYEKÎ BILIND
(SEYDAYÊ MEHMÛDÊ SEBRÎ)-
Imranê Menteş

Pênûsa Azad22

! ! - !      ! ! - !     ! ! - !

Diyarî giyanê seydayê min Mehmûdê Sebrî evîndarê xemgîn.

Gurzek silav bo rêberê hest raperîn

Mamosteyê ristên qeşeng¹ û pir şirîn

 

Mamosteyê sincê² bilind, hişmend û jîr

Hozan û zana, behremendê³ kûrnerîn

 

Koça te barkir, ey delalê xoşewîst⁴

Xatir nexwest gava tu çû dil ma birîn

 

Gava tu çû reş bû behar gul çilmisîn

Dost û heval zû hêsirên wan gindirîn

 

Em tev de dêşin pir bi êş in rêwiyo

Malbat û pirtûk va dikin nal û girîn

 

Derd û kulên xaka welat tev man û man

Ey bendewarê serxwebûna gul bi bîn

 

Nasnameya Kurdên li Sûrî da xuyan

Hoz û nijadê⁵ Kurd xuyakir şopgerîn

 

Doza giran⁶da ser Milan her bê hedan

Her çax û dem êşên welat tev azirîn

 

Ristên terazû⁷şaxvedan berhem didan

Şagirt li ser rêça te man baş afirîn

 

Geştek li nav baxê Cizîrî ⁸ pêkve çûn

Tev Nêrgiz û qîzên bedew hem 'enberîn

 

Salix⁹ û pesnê merd şepalan daye pêş

Salix û pesnê şenge zîban porzerîn

 

Berhem dimînin em bi wan baş fêrdibin

Elmaz û zêr in em bi wan tev hêwirîn

 

Çendî te got: Ger em bibin yek rêz û dil

Dozên me yên azadiyê zor sincirîn

 

Koh¹⁰ û bilnd her  tû li ezmanê welat

Cûdî, Xelat bû hem Sefîn û Hindirîn

 

Her zindî ye qet namirî bavê dehan¹¹

Pirtûk te hiştin nerx¹² buha nayên kirîn

 

Cardî silav hey perwerê¹³ xaka welat

Em her dibêjin: Sed silav û aferîn.

^{24. 8. 2023}

Ravekirina bêjeyan _____________________

1.      Qeşeng: Spehî, xweşik.

2.      Sinc: Dan û standin, (exlaq).

3.      Behremend: Kesê ku ji sirişta xwe ve jêhatî be di tiştekî de.

4.      Xoşewîst: Delalî, hêja hezkirî.

5.      Nijad: Reha netewî yan a hozî, regez. Mebest pirtûka seyda ya bi navê (Nasnameya Kurdî li sûrya).

6.      Doza giran: Dîwana seydayê Mehmûd e (Doza giran û umîd û xwezgayên tevlihev) beşê yekem û duyem.

7.      Ristên terazû:  Mebest pirtûka seyda ya bi navê (Nerînek di terazû ya ristên Kurdî de).

8.      Geştek li nav baxê Cizîrî: Mebest pirtûka seyda ya bi navê(Geştek li nav baxê ristên Cizîrî, Beşê yekem û duyem).

9.      Salix: Mebest pirtûka seyda ya bi navê (Salixên Merd û zîbayên Kurd).

10.  Koh: Çiya:

11.  Bavê dehan: Mebest ew berhemên Mehmûdê sebrî ye.

12.  Nerx: Biha, kiranî, qedir.

13.  Perewr: Dilsoj, dilxwazêrast, (muxlis).

 

Têbînî:  

-   Berhemên  Nivîskar  Mehmûdê  Sebrî evin:

 

           1.      Nigarên kul û derdên jiyanê (helbest) 1996. Z

           2.      Nerînek di terazû ya ristên Kurdî de (vekolîn) 1997.Z

           3.      Geştek li nav baxê ristên Cizîrî (beşê yekem)2000. Z

           4.      Hin hest û ramanên netewî û civakî 2002. Z

           5.      Geştek li nav baxê ristên Cizîrî (beşê duyem) 2003. Z

           6.      Doza giran û umîd û xwezga yên tevlihev (beşê yekem). helbest 2006. Z

           7.      Doza giran û umîd û xwezgayên tevlihev (birra duyem).helbest 2007. Z

           8.      Nasnameya Kurdî li sûrya (vekolîn) 2011. Z

           9.      Cengên xaçparêzî û şikodarîya berevanîya Kurdî (vekolîn) 2013. Z

         10.    Salixên merd û zîbayên Kurd (helbest) 2017. Z

 

  

ديسمبر 05, 2025