Helbest -Dayê -Anahîta Hemo
Dengê lavijên destnimêja te ,
Bawermendî û dilpakiya te ,
Dengê zaroktiya min a zelal in ,
Henasên te yên zîz û hestyar,
Ji giyanê min cuda nabin ,
Pîroztirîn , nazdartirîn, bilindtirîn,
şêrîntirîn peyv di hemî zimanên dunyayê de
Peyva “Dayê” ye.
Ava dilop-dilop ji zendê destnimêja te
dinisile ,
Di giyanê min de vedeng dide,
Rojên min pê vejîn dibin.
Hemû ziman,
Bi hemû tîp û bêje û hevokên xwe ve ,
Li hember bêjeya “ DAYÊ” lal dimînin,
Sûnda min a herî mezin di jiyanê de ,
Bi pîroziya navê te ye,
Bi pakiya dilê te ye,
Şêrînbûna hestê te ye,
Ew Ayetên li ser damarên dilê te sermedî mane,
Bêyî tu di zimanê wan bigihêje
Berbanga spêdê ,
Xemla roj û salên temenê min in.
Bi rondikên germ, kelek bê rawestan ,
Mîna kelkela bûyerên bajarê min ,
Ez bêriya te dikim dayê.
Di van demên agirîn de,
Tu hestê pênûsa min î.
Destberjor im ,
Ji bo xweda spasdar im,
Li ser zelalbûna dengê te yê di cane min de ,
Li her derê
Di her demê
Tu şîrava jiyana min î,
Rewş û xemla rojên min î,
Baweriya dilê min î,
Herdem bi te geş im dayê
Çendî jiyan ziwa bibe,
Tu behara can î dayê.
5-10-2003, Qamişlo
Anahîta Hemo
ليست هناك تعليقات: